Xəbərlər

Naxçıvan KOB İnkişaf Mərkəzi (KOBİM) tərəfindən "Təchizatda əlavə dəyər yaratma" mövzusunda maarifləndirici təlim keçirilib

Naxçıvan KOBİM tərəfindən növbəti təlim keçirilib Kiçik və Orta Biznesin İnkişafı Agentliyinin (KOBİA) Naxçıvan KOB İnkişaf Mərkəzi (KOBİM) tərəfindən "Təchizatda əlavə dəyər yaratma" mövzusunda maarifləndirici təlim keçirilib. Noyabrın 19-da təşkil olunan təlimdə Naxçıvan KOBİM-in eksperti tərəfindən təchizat zəncirində əlavə dəyər yaradan proseslər, təchizatçı seçimi və qiymətləndirmə meyarları, material və xidmət keyfiyyətinin artırılması, əməliyyatların optimallaşdırılması və xərclərin azaldılması üçün tətbiq olunan yanaşmalar barədə ətraflı məlumat verilib. Eyni zamanda 7 nəfər iştirakçının olduğu təlimdə təchizat proseslərində innovasiya, rəqabət üstünlüyü yaratmaq üçün dəyər təklifinin formalaşdırılması, tərəfdaşlıq münasibətlərinin gücləndirilməsi, davamlı təchizat strategiyaları və real biznes nümunələri üzərində praktiki izahlar ilə bağlı məlumat verilib. Sonda iştirakçıların mövzu ilə bağlı sualları cavablandırılıb. Qeyd edək ki, Naxçıvan KOBİM tərəfindən göstərilən bütün xidmətlər ödənişsizdir.